Aih, ini hari yang paling buat beta sanang. Dari tadi papagi beta bangun tidor su bajanji deng kawan mo pi dia pung rumah untuk manonton siaran lansung penganugerahan gelar Oscar. Ini bukan karena beta sonde ada tivi di beta pung rumah, tapi karena sonde ada tivi nasional yang mau menyiarkan acara itu atau tepatnya sonde ada yang mo beli dia pung hak siar, na sudah su, beta ke orang bingung sa. Senang tapi basibuk cari tampa untuk manonton. Alasan beta pi beta pung kawan pung rumah karena di dia pung rumah ada tivi kabel atau tivi berlangganan jadi katong bisa nonton deng enak. Beta paling suka acara bagini-bagini na, jadi sonde apapa beta barkorban sadiki.
Na ketika beta su bangun papagi eh kawan batelpon su bilang beta harus ke lokasi kakaen sakarang ju. Dia bilang beta harus katumu deng ibu kapala sakola soal rancana katong melakukan diskusi terarah deng guru-guru soal toilet training buat ana sakola dong. Aih, beta paling pamalas su kalo mandadak bagini. Kan beta mo pi nonton acara Oscar. Beta su kasi alasan tapi beta pung kawan satu ni sonde mau tau lai, dia mangamok su ma. Beta pikir-pikir na sudah su, beta relakan son nonton Oscar papagi bagini, beta harus basiap-siap pi sakola sa.
Abis dar sakola beta dapa kabar gembira, beta pung aktris favorit Kate Winslet manang Oscar untuk dia pung acting di filem the reader. Ai situ ju, beta pung jagoan laen ke almarhum Heath Ledger yang barmaen bagus di the dark knight deng nona manis yang seksi Penelope Cruz ju manang. Beta sanang minta ampun sampe lupa beta bolom makan siang. Aih, parsetan su deng makan siang, meski beta son jadi manonton dong pung aksi sacara langsung tapi beta sanang-sanang sa.
dar sakola beta langsung bajalan, tapaleuk son ada tujuan. beta talalu sanang na. Sampe amper lupa kalo beta harus barkunjung ke panti jompo lai, na oma-oma dong disana su tunggu beta mau bacarita deng dong. Beta sanang sa, yang panting idola-idola beta su manang meski beta son jadi nonton Oscar!
Jogja, 23 Februari 2003
Tidak ada komentar:
Posting Komentar
Beta tunggu lu pung komentar di sini, danke...